ەنەرگەتيكا مينيسترلىگى تاڭداپ العان جوبالاردىڭ 28-ءى وتاندىق ونەرتاپقىشتاردىڭ تۋىندىسى ەكەن. ولاردىڭ ىشىندە ەنەرگيالىق ۇنەمدىلىكتى ارتتىراتىن جانە قالدىقتاردى كادەگە جاراتۋعا ارنالعان تىڭ تەحنولوگيالار بار. سونىمەن قاتار, شەتەلدىك اۆتورلاردىڭ دا كورمەدە ۇسىنعان زاماناۋي جوبالارى ىرىكتەلىپ الىنعان. اتاپ ايتقاندا, نەمىستىڭ تەحنولوگياسى ەنەرگيانى الىسقا تاسىمالداعاندا قۋات كوزدەرىن ۇنەمدەسە, ەندى ءبىرى جەراستى سۋ مەن توپىراقتان ەنەرگيا الۋعا مۇمكىندىك بەرەدى. پايدالى دەپ تانىلعان جوبالاردىڭ ىشىندە بەلارۋستىڭ «ترۋبوسفەرا» تەحنولوگياسى دا بار. وسى جوبا ارقىلى گازدىڭ قىسىمىن بارىنشا ازايتىپ, وندىرىلگەن ەنەرگيانى مۇناي-گاز سالاسىندا كەڭىنەن پايدالانۋعا بولادى ەكەن. بۇعان قوسا, اعىن سۋلاردى تازارتۋعا ارنالعان فين تەxنولوگياسى اۋىزسۋدى تازارتىپ قانا قويماي, سۋدىڭ تۇبىندە تۇنىپ قالعان لايدى تىڭايتقىش رەتىندە ءوندىرىپ بەرەدى. بۇگىندە فينليانديانىڭ ءبىر جوباسىن «قازگيدرومەت» سىناقتان وتكىزۋگە كىرىسىپتى.
«كوگىلدىر كومىر» اتتى پولياك تەxنولوگياسى قورشاعان ورتاعا شىعارىلاتىن زياندى قالدىقتاردى 80 پايىزعا تومەندەتەدى. كومىردىڭ قىزۋىن دا ءتيىمدى پايدالانۋعا مۇمكىندىك بەرەدى. بىزگە مۇنداي تەxنولوگيا اسا قاجەت. سوندىقتان بۇل تەحنولوگيانى دا بولاشاقتا ءتيىمدى پايدالانۋعا ىرىكتەپ الدىق. ءبىز تاڭداپ العان جوبالاردى تاجىريبەگە ەنگىزۋ ماسەلەسىمەن ارنايى ساراپشىلار توبى اينالىسىپ جاتىر. ولاردىڭ قۇرامىنا «قازمۇنايگاز», «قازترانسگاز», «كەگوك» سىندى ۇلتتىق كومپانيالاردىڭ 40-تان استام ساراپشىسى جانە ەنەرگەتيكا سالاسىنىڭ كاسىبي ماماندارى, مينيسترلىك پەن ونىڭ قۇرىلىمدىق بولىمشەلەردىڭ وكىلدەرى بار», دەيدى ۆيتسە-مينيستر.
ساراپشىلاردان قۇرالعان جۇمىس توبى اۆستريا, گەرمانيا, نيدەرلاندى, رەسەي, فينليانديا سىندى مەملەكەتتەردىڭ الدىڭعى قاتارلى تەحنولوگيالارىن ىرىكتەپ الىپ, ونى ءتورت توپقا جىكتەپتى. جوبالاردىڭ 27-ءسى – مۇناي جانە گاز, 5-ەۋى – كومىر مەن اتوم ونەركاسىبى, 44-ءى – ەنەرگيا سالاسىنا, باسقالارى ەكولوگيا, اۋانى تازارتۋ, قوقىستى جاراتۋ سالالارىنا توپتاستىرىلعان. قازىرگى ۋاقىتتا ۇزدىك جوبالاردىڭ 40-تان استامى 9 وتاندىق كومپانيادا زەرتتەلۋ ۇستىندە بولسا, 14 تەحنولوگيانى – ەكى ۋنيۆەرسيتەت, تاعى 12 جوبانى جەرگىلىكتى اكىمدىكتەر قولعا العان.
ۆيتسە-مينيستر سونداي-اق, جانار جاعار مايدىڭ باعاسىنا بايلانىستى قويىلعان ساۋالعا دا جاۋاپ بەردى. ول كەيبىر وڭىرلەردىڭ جانار-جاعارماي قۇيۋ بەكەتتەرىندە بەنزين تاپشىلىعى بايقالىپ وتىرعانىن ايتا كەلىپ, ونىڭ باستى سەبەبى بەنزيننىڭ رەسەيدەن تاسىمالدايتىنىندا ەكەنىن جەتكىزدى. قازىرگى كۇنى رەسەيدىڭ ەنەرگەتيكا مينيسترلىگىمەن كەلىسسوزدەر جۇرگىزىلىپ جاتىر. ۆيتسە-ءمينيستردىڭ ايتۋىنشا, قىركۇيەكتىڭ اياعىنا دەيىن جانار-جاعارماي قۇيۋ بەكەتتەرىندەگى جاعداي تۇزەلۋى ءتيىس.
قىمبات توقتامۇرات,
«ەگەمەن قازاقستان»
